Almaty Resort клиникалық шипажайында тамақтану сапасына ерекше көңіл бөлінеді. Мұндағы «Береке», «Жетісу», «Жібек жолы» және «Хан-Шатыр» мейрамханалары жыл сайын жоғары сапа талаптарына сәйкестігін растап келеді. Ал кезекті аудиторлық бағалаудан кейін шипажайға бес жұлдыз санаты берілді. Біз дәрігер-диетолог Камила Бақытпен әңгімелесіп, тағамдардың қонақтарға ұсынылар алдында қалай тексерілетінін, шипажай мәзірі қалай жасалатынын және маусымдық жемістердің ағзаға қандай пайдасы бар екенін сұрап білдік.

— Камила, жұмыс күніңіз неден басталады? Қонақтар таңғы асқа келгенге дейін асханада қандай жұмыстар атқарылады?

— Менің жұмыс күнім сәл ертерек басталады. Өйткені әр тамақтану алдында дайын тағамдарға міндетті түрде бракераж жүргіземіз. Бұл — тағамды қонақтарға ұсынар алдындағы оның сапасы мен қауіпсіздігін бақылау. Біз тағамның сыртқы түрін, дәмін, иісін, консистенциясын, ұсынылу температурасын, дайындық деңгейін және бекітілген мәзірге сәйкестігін бағалаймыз. Осы бақылаудан өтіп, тиісті белгі қойылғаннан кейін ғана тағамдар қонақтарға ұсынылады.

— Шипажай үшін мұндай бақылау қаншалықты маңызды?

— Өйткені мұнда тамақтану — кешенді сауықтырудың бір бөлігі. Тағам тек дәмді әрі алуан түрлі ғана емес, қауіпсіз, теңгерімді және белгілі бір талаптарға сай болуы керек.

— Тағамдар тексеруден өткеннен кейін де сіз ас әзірлеу процесін бақылауды жалғастырасыз ба?

— Иә. Тамақтану басталғаннан кейін залды аралап, қонақтарға тамақтанудың қалай ұйымдастырылғанын, тағамдардың ұсынылуын бақылап, қажет болған жағдайда қонақтармен сөйлесемін. Егер адамның белгілі бір тағамдық шектеулері болса немесе оған арнайы емдәм тағайындалса, оның рационын жеке түзетеміз және қажет болған жағдайда бөлек мәзір құрамыз.

— Бір мезетте пайдалы, алуан түрлі әрі дәмді мәзір құрастыру қаншалықты қиын?

— Бұл — күнделікті атқарылатын үлкен жұмыс әрі командалық жауапкершілік. Мәзірді біз шеф-аспазбен, су-шефпен және басқа да мамандармен бірлесіп әзірлейміз. Тағамдардың тағамдық құндылығы мен калориялылығын, рационның теңгерімділігін, әзірлеу технологиясын және әртүрлі емдәмдердің талаптарын ескеру қажет. Адам тек тағайындалған диетаны сақтап қана қоймай, тамақтанудан ләззат алуы да маңызды.

— Қазір жеміс-жидектердің піскен маусымы. Рационға қандай маусымдық жемістерді қосуға кеңес бересіз және олардың пайдасы қандай?

— Жаз мезгілінде жаңа піскен жемістер мен жидектердің түрі өте көп. Олар — дәрумендер, минералдар, тағамдық талшықтар және басқа да пайдалы заттардың көзі. Олар рационды түрлендіруге, ас қорыту жүйесінің қалыпты жұмысын және зат алмасуды қолдауға көмектеседі. Бірақ бір жемісті «ең пайдалысы» деп бөліп айтпас едім. Ең маңыздысы — әртүрлілік пен мөлшерді сақтау.

— Мысалы, алма, өрік, қарбыздың қандай пайдасы бар?

— Әр жемістің өзіндік құрамы бар. Алма тағамдық талшықтарға бай және күнделікті рационға жақсы сәйкеседі. Өріктің құрамында дәрумендер мен минералды заттар бар. Ал қарбыз, басқа пайдалы қасиеттерімен қатар, ағзадағы сұйықтық қорын толықтыруға көмектеседі. Сондықтан жазда түрлі маусымдық жемістерді рационға қосу мүмкіндігін пайдаланған жөн.

— Almaty Resort мәзірін әзірлеу кезінде маусымдық жемістер қалай ескеріледі?

— Біз өнімдердің маусымдылығын міндетті түрде ескереміз. Бұл ретте тек дәмдік қасиеттеріне ғана емес, тағамдық құндылығына, калориялылығына және рационның қонақтардың қажеттіліктеріне сәйкестігіне де қараймыз. Әрине, емдәм түрлерін де ескереміз. Бір адамға пайдалы болған өнім екіншісіне әрдайым сәйкес келе бермейді. Сондықтан қажет болған жағдайда рационды жеке түзетеміз.

— Жемістер де ағзаны қалпына келтіру процесінің бір бөлігі деп айтуға бола ма?

— Әрине, егер олар жалпы рационға дұрыс енгізілсе. Шипажайдағы тамақтану ортақ мақсатқа — ағзаны қолдауға және басқа да сауықтыру процедураларын толықтыруға бағытталуы керек. Сондықтан мәзірге жай ғана пайдалы өнімді қосу жеткіліксіз, оны теңгерімді рационға дұрыс енгізу маңызды.

— Сіз қонақтарға кеңес те бересіз. Олардан қандай сұрақтар жиі түседі?

— Мен қонақтарға шипажайда болған кезде қалай тамақтану керектігін ғана емес, үйге оралғаннан кейін де дұрыс тамақтану әдеттерін қалай сақтауға болатынын түсіндіруге тырысамын. Теңгерімді сақтау, әртүрлі тамақтану, маусымдық өнімдерді таңдау және ағзаның жеке ерекшеліктерін ескеру маңызды.

— Жемістер маусымы денсаулыққа пайдалы болу үшін қандай негізгі кеңес берер едіңіз?

— Әртүрлілік пен мөлшерді сақтаңыздар. Жемістерді толыққанды тамақтың орнына қолдануға немесе оларды шектен тыс мөлшерде жеуге болмайды. Ең дұрысы — оларды теңгерімді рационның құрамына енгізіп, өзіңізге сәйкес келетін өнімдерді таңдау. Сонда маусымдық жемістер дәмді тағам ғана емес, күнделікті дұрыс тамақтанудың пайдалы бөлігіне айналады.